Innlán voru stærsti hluti peningasjóðs Kaupþings

Innlán voru tveir þriðju eigna peningamarkaðssjóðs Kaupþings. Annað var í skuldabréfum og voru bréf frá Kaupþingi og Existu rúmlega 18% af eignum sjóðsins.

Kaupþing hefur birt samsetningu peningamarkaðssjóðs bankans en Glitnir og Landsbankinn hafa ekki viljað birta upplýsingar um samsetningu sinna sjóða. Áður en Kaupþingi Peningamarkaðssjóði var slitið skiptust eignir sjóðsins í innlán sem námu 66% af sjóðnum, skuldabréf fjármálafyrirtækja sem námu 14% og skuldabréf fyrirtækja sem námu 20%. Skuldabréfin sem voru gefin út af Kaupþingi og Existu, stærsta hluthafa Kaupþings, voru rúm 18 prósent af eignum sjóðsins.

Stærð peningamarkaðssjóðs Kaupþings skrapp saman frá desember 2007 úr 85 milljörðum í rúma 36 milljarða. Á meðan sjóðurinn minnkaði að stærð jukust innlánin á móti en fjárfestingar sjóðsins í skuldabréfum fjármálafyrirtækja og fyrirtækja drógust saman. Þegar sjóðurinn var leystur upp fengust öll innlán að fullu greidd en vegna niðurfærslu skuldabréfa fyrirtækja og fjármálafyrirtækja nam heildarlækkun sjóðsins 14,7 prósentum.

Í yfirlitinu sem Kaupþing sendi frá um málið kemur fram að peningamarkaðssjóðir hafi verið mikilvægur hlekkur í fjármögnun fyrirtækja og fjármálastofnana í landinu auk þess sem margir einstaklingar hafi átt sparnað sinn í slíkum sjóðum. Það sé því umhugsunarvert hvort rétt hafi verið að leggja eingöngu áherslu á að innlán væru trygg í stað þess að koma til móts við sparnað landsmanna í peningamarkaðsstjóðum líkt og gert hefur verið í Bandaríkjunum og víða í Evrópu.