Landsbankinn fagnar aðgerðum ríkisstjórnarinnar

„Skjótar og ákveðnar aðgerðir yfirvalda í dag bera vott um skýran vilja til þess að styrkja stoðir íslensks efnahagslífs og fjármálakerfis." Þetta segir í yfirlýsingu frá Landsbankanum. Segir þar enn fremur að stjórnendur bankans telji aðgerðir ríkisstjórnarinnar jákvæðar og til þess fallnar að styrkja efnahagskerfið í heild sinni auk þess sem þær muni leiða til frekari sameiningartækifæra hérlendis.

„Nú er rúmt ár síðan áhrifa lánsfjárkreppu fór að gæta á fjármálamörkuðum heimsins. Atburðir síðustu vikna, sem hafa haft áhrif á stærstu fjármálafyrirtæki heims, marka án efa spor í söguna og munu að líkindum breyta fjármálaheiminum varanlega," segir í yfirlýsingu bankans.´

Þá segir: „Landsbankinn hefur valið sér viðskiptamódel sem er blanda af viðskiptabankastarfsemi og fjárfestingarbankastarfsemi, þ.e. alhliða banki sem byggir á traustri stöðu á viðskiptabankamarkaði bæði á einstakling- og fyrirtækjamarkaði en með eignastýringu og fjárfestingarbankastarfsemi sem mikilvægar stoðir í heildarstarfseminni. Hátt hlutfall innlána á móti útlánum, 63 prósent, er bankanum einnig mikill styrkur. Þetta er viðskiptamódel sem markaðsaðilar eru sammála um að geti staðist það mótlæti sem fjármálafyrirtæki glíma nú við.

Lausafjárstaðan sterk

Lausafjárstaða Landsbankans er sterk og endurgreiðsluferill bankans léttur eða aðeins 855 milljónir evra á tímabilinu 2H08 - 1H09. Þann 29. september var lausafjárstaða bankans 8,0 milljarðar evra, samanborið við 7,8 milljarða evra 30. júní.

Jákvæðar aðgerðir ríkisstjórnarinnar nú í morgun undirstrika staðfestu stjórnvalda til að styrkja íslenska fjármálageirann og gera hann betur í stakk búinn að takast á við þá markaðsröskun sem nú á sér stað á alþjóðlegum fjármálamörkuðum."