Óljóst hvort Salt muni styðja ríkisvæðingu Glitnis

Árni Harðarson, forstjóri Salt Investments, segir að þar á bæ séu menn súrir yfir atburðum gærdagsins þegar ríkið yfirtók Glitni að stórum hluta. Salt Investments, sem er í eigu Róberts Wessman, var sjöundi stærsti hluthafinn í Glitni og reiknað er með að félagið hafi tapað tæpum fimm milljörðum á gjörningnum. Hann segir þó að Salt muni þola ágjöfina. Óvíst er hvort Salt muni styðja ríkisvæðinguna á hluthafafundi.

„Við erum auðvitað mjög súrir yfir því tapi sem við lendum í," segir Árni í samtali við Vísi. Hann segir að Salt Investment muni þola þessa ágjöf, „Við þolum þetta alveg, en menn eru ekki kátir. Við verðum bara að kyngja þessu tapi ef það verður raunverulegt, það er bara þannig, því miður." Á dögunum var sagt frá því að Salt Investments ætlaði að leggja tvo og hálfan milljarð inn í Actavis. Árni segir að fréttir helgarinnar hafi engin áhrif á það mál.

Árni segist eiga erfitt með að meta hvort hluthafar Glitnis eigi eftir að samþykkja gjörninginn. „Það þarf auðvitað tvo þriðju hluthafa til þess að samþykkja þetta og ég veit bara ekki hvort þetta er klappað og klárt eða ekki. En það er allavega búið að opna fyrir viðskipti með bréfin, sem kom kannski mörgum á óvart."

Að mati Árna og félaga hans hjá Salt voru margar aðrar leiðir færar í stöðunni. „En þetta var leiðin sem var valin og við erum að meta stöðuna núna." Hann segir óljóst hvort Salt muni leggjast gegn tillögunni þegar hún verður lögð fyrir hluthafa. „Ég veit það ekki,það eru nú einhverjir dagar í þennan fund og við þurfum aðeins að sjá hvað gerist í framhaldinu. Miðað við hvað getur gerst á einni helgi þá gæti nú ýmislegt gerst á þeim tíma sem líður fram að fundinum."

Árni segist telja að flestir hluthafanna séu að reyna að meta stöðuna, hver endapunkturinn verði í þessu tafli. „Ég held að hann liggi ekki alveg fyrir." Hann segist ekki vilja að svo stöddu gagnrýna aðdragandann og vinnubrögðin í málinu enda viti hann ekki nægilega mikið um það mál.

„Við erum að reyna að komast til botns í þessu máli. Ef að sú skoðun leiðir í ljós að það hafi eitthvað verið athugavert við þessu vinnubrögð munum við gagnrýna það. Við vorum ekki með á neinum fundum um helgina. Jón Ásgeir virðist hafa verið það og hann er að gagnrýna málið í Fréttablaðinu. Við erum því bara ekki í stöðu til þess eins og er," segir Árni að lokum.