Nýr framkvæmdastjóri hjá Icelandic Japan og Marinus Seafood

Jón Magnús Kristjánsson framkvæmdastjóri Icelandic Japan og Marinus Seafood ehf, dótturfyrirtækja Icelandic Group hf, hefur ákveðið að láta af störfum eftir langt og afar farsælt starf hjá félaginu. Við tekur Jónas Engilbertsson samkvæmt tillögu Jóns Magnúsar um eftirmann sinn. Þeir hafa unnið saman undanfarin ár að rekstri félaganna.

Í tilkynningu frá Icelandic Group segir að undanfarin misseri hafi Jónas unnið að uppbyggingu á aðfangaöflun og framleiðslu fyrir Japansmarkað. Að sama skapi hafi Jónas annast kynningu á félaginu á mörkuðum annars staðar en í Austurlöndum fjær og hefur megináherslan verið á Evrópu.

Marinus er markaðs- og aðfangafyrirtæki sem ber meðal annars ábyrgð á öflun aðfanga fyrir Japansskrifstofu Icelandic. Marinus er einnig í miklum viðskiptum við Kína og önnur lönd í Austurlöndum fjær. Fyrirtækið er með höfuðstöðvar í Korngörðum í Reykjavík.