Væntingar aldrei verið minni í september frá því mælingar hófust

Væntingarvísitala Gallup hefur aldrei farið lægra í septembermánuði frá því að mælingar vísitölunnar hófust árið 2001. Er vísitalan nú tæplega 40% lægri en á sama tíma fyrir ári síðan.

Fjallað er um málið í Morgunkorni greiningar Glitnis. Þar segir að væntingavísitala Gallup hækkaði í september, annan mánuðinn í röð, og mælist nú 76,2 stig sem er tveimur stigum meira en í fyrri mánuði.

Þegar væntingavísitalan mælist undir 100 stigum eru fleiri svarendur neikvæðir en jákvæðir á stöðu og horfur í efnahagslífinu. Vísitalan hefur nú verið undir 100 stigum síðan í febrúar á þessu ári.

Allar undirvísitölur væntingavísitölunnar eru eftir sem áður talsvert undir 100 stiga gildinu sem markar skilin milli svartsýni og bjartsýni.