Moody´s lýsir yfir áhyggjum af stoðum bankakerfisins

Matsfyrirtækið Moody's hefur lækkað lánshæfiseinkunn Glitnis á langtímaskuldbindingum úr A2 í Baa2, á skammtímaskuldbindingum úr P1 í P2 og fjárhagslegan styrkleika úr C- í D.

Þá eru horfur fyrir fjárhagslegan styrkleika neikvæðar eins og segir í tilkynningu Glitnis til Kauphallarinnar. Enn fremur hefur Moody´s einnig tekið lánshæfiseinkunn Kaupþings og Landsbankans til skoðunar til mögulegrar lækkunar og er þar vísað til sífellt veikari stoða íslenska bankakerfisins í ljósi skorts á lausafé.

Einkunn Kaupþings vegna langtímaskuldbindinga, A1, og einkunn vegna fjárhagslega styrkleika, C-, hafa verið teknar til athugunar vegna hugsanlegrar lækkunar, en Moody's staðfestir á sama tíma einkunn bankans vegna skammtímaskuldbindinga, P-1, sem er hæsta einkunn sem Moody´s gefur.

Lánshæfismatseinkunn Landsbankans, A2 / C-, er einnig tekin til skoðunar með mögulega lækkun í huga. Hins vegar hefur einkunn vegna innlendra og erlendra skammtímaskuldbindinga bankans, P-1, verið staðfest.