Lágmarkstrygging er nú 3 milljónir kr. á innistæðum í bönkum

Lágmarkstrygging á innistæðum sparifjáreigenda nemur nú um 3 milljónum kr. Þetta kemur fram á heimasíðu talsmanns neytenda í dag.

Á síðunni segir að vegna gengishruns íslensku krónunnar nemur þessi fjárhæð - sem er tengd við 20.000 evrur samkvæmt Evrópureglum, nú rúmum þremur milljónum kr.

Nokkuð hefur borið á fyrirspurnum neytenda og fjölmiðla undanfarið og hefur talsmaður neytenda því að nýju fengið staðfest hjá lögbundnum tryggingarsjóði að samkvæmt íslenskum lögum eru neytendur og aðrir eigendur innistæða og verðbréfa hjá íslenskum fjármálastofnunum tryggðir upp að þessu lágmarki í hverri fjármálastofnun.

Innistæðueigendur njóta frekari verndar en lögbundnar tryggingar gefa til kynna og þurfa sparifjáreigendur því ekki að óttast um sinn hag í kjölfar ríkisvæðingar Glitnis banka.

Neytendur, sem lagt hafa sparnað sinn í áhættusamari fjárfestingu með kaupum á hlutabréfum, njóta ekki slíkrar verndar.

Auk þess virðast atburðir undanfarna tvo sólarhringa hafa staðfest að fyrir hendi sé óbein viðbótartrygging ríkisins á innlánum.