Skýrist á næstum dögum hvort Straumur og Landsbankinn sameinist

Á næstu dögum mun skýrast hvort Landsbankinn og Straumur sameinist. Allt veltur á því hvort skýrslur matsfyrirtækja á borð við Fitch og Moodys verði jákvæðar eða neikvæðar í garð samrunans. Skýrslurnar eiga að liggja fyrir í vikunni.

Unnið hefur verið að því í nokkurn tíma á bak við tjöldin að finna út hvort samruni þessara tveggja banka muni vera til góðs. Heimildir fréttastofu herma að umsagnir erlendra matsfyrirtækja skipti þar mestu máli og þær muni liggja fyrir í vikunni. Ef lánhæfismat sameinaðs banka verður lægra en það sem bankanir tveir búa við í dag verður samruninn sleginn af borðinu.

Þegar kemur að því að meta ágóðann af sameiningu bankanna tveggja verður að hafa í huga að feðgarnir Björgólfur Guðmundsson og Björgólfur Thor Björgólfsson eru stærstu hluthafar í bæði Landsbankanum og Straumi. Með sameiningunni verður til mun stærri eining sem gerir það að verkum að hægt er að hagræða verulega í rekstri. Til að mynda reka báðir bankarnir rándýr útibú í London.

Þótt Straumur sé með viðskiptabankaleyfi, þá er bankinn fyrst og fremst fjárfestingabanki og eftir því sem fréttastofa kemst næst þá eru engin innlán hjá bankanum. Með því að sameinast viðskiptabanka eins og Landsbankanum þá muni öll fjármögnun verða auðveldari.

Ekki náðist í Sigurjón Þ. Árnason, bankastjóra Landsbankans, við vinnslu þessarar fréttar en Ólafur Teitur Guðnason, fjölmiðlafulltrúi Straums, sagði það stefnu bankans að tjá sig ekki um orðróm á markaði.