Segir vaxtadag Seðlabankans á morgun vera óþarfan

Greining Glitnis segir að vaxtaákvörðunardagur Seðlabankans á morgun sé í raun óþarfur þar sem Alþjóðagjaldeyrissjóðurinn (IMF) hefur í samvinnu við ríkisstjórnina tekið við stjórnun peningamála, a.m.k tímabundið.

Í umfjöllun um málið í Morgunkorni greiningarinnar segir að komin sé upp nokkuð áhugaverð staða í peningastjórnun hér á landi.. Í takt við viljayfirlýsingu ríkisstjórnarinnar og IMF voru stýrivextir þannig hækkaðir úr 12% í 18% í síðustu viku.

Vaxtahækkunina átti að framkvæma áður en framkvæmdastjórn IMF tæki ákvörðun um hugsanlegt lán til Íslands og legði blessun sína yfir aðgerðaáætlun ríkisstjórnar og sjóðsins. Reiknað var með þeirri ákvörðun á þriðjudaginn en nú er ljóst að framkvæmdastjórn IMF mun ekki taka málið fyrir fyrr en á föstudaginn.

„Á morgun verður hins vegar vaxtaákvörðunardagur Seðlabankans sem var fyrir löngu ákveðinn og nú má spyrja sig hvaða merkingu dagurinn hefur þegar ljóst er að það er ekki í höndum bankans að ákveða vexti," segir í Morgunkorninu

Ljóst er að bankinn vill ekki setja hugsanlega lánveitingu IMF í uppnám og mun því halda vöxtum óbreyttum. Engin óvissa virðist um það og vaxtaákvörðunardagurinn að því leytinu til óþarfur. Það sem verður hins vegar áhugavert er að heyra umræðu bankastjóra Seðlabankans um stöðu bankans í þessu nýja umhverfi.

Greining segir að einnig verði áhugavert að sjá efnahagsspá Seðlabankans sem verður birt á morgun ásamt þeim ferli stýrivaxta sem talinn er að muni stuðla að því að ná verðbólgumarkmiði bankans á næstu misserum.

Mun þar eflaust felast í forsendum eitthvað af þeim aðgerðum sem ráðast á í hér á næstu misserum til úrlausnar banka- og gjaldeyriskreppunni. Kann spáin þannig að gefa einhverjar vísbendingar um innihald ofangreindrar viljayfirlýsingar IMF og ríkisstjórnarinnar sem annars er trúnaðarmál þar til framkvæmdastjórn sjóðsins hefur samþykkt lánveitinguna.