Afborganir af langtímaskuldum bankanna nema 1.380 milljörðum kr.

Í heild nema afborganir af langtímaskuldum stóru viðskiptabankanna um 1.380 milljörðum kr. á næsta ári. Eru þá taldar skuldir erlendra dótturfélaga og móðurfélaganna á Íslandi.

Þetta kemur fram í nýrri hagspá greiningar Landsbankans sem kynnt var í morgun. Þar kemur fram að ein helsta ögrunin framundan í rekstri bankanna sé endurfjármögnun skulda og viðbrögð við auknum fjármagnskostnaði.

Hluta af þörfinni hefur verið mætt. Þannig hefur Kaupþing til að mynda lokið fjármögnun ársins 2008 með lántöku upp á um 340 milljarða kr og aukningu innlána. Og bankinn er langt kominn með næstu 12 mánuði. Hvað innlánin varðar kemur fram í hagspá greiningar Landsbankans að stærsta breytingin hjá Kaupþingi er vöxtur innlána á Edge reikingum þeirra erlendis. Innistæður á þeim reikningum vaxa um nær 100 milljarða á mánuði að jafnaði.

Hvað Landsbankann varðar eru endurfjármögnunarþörf hans tiltölulega lítil í ár í samanburði við hina bankana. Hefur henni verið mætt með nýjum erlendum lántökum upp á um 210 milljarða kr. og aukningu innlána á Icesave innlánsreikningum bankans í Bretlandi og Hollandi.

Hjá Glitni er enn unnið að fjármögnun á endurgreiðslum ársins í ár. Fram kemur hjá greiningu Landsbankans að Glitnir getur ekki treyst á vöxt innlána til að fjármagna endurgreiðslur langtímalána þar sem vinna bankans við að auka innlán á netreikninga er skemmra á veg komin en hjá hinum bönkunum.