Hagnaður ríkisins af Glitnishlut yfir 200 milljarðar

Ríkið hefur grætt 204 milljarða á 75 prósent hlut sínum í Glitni það sem af er morgni. Á sama tíma hafa aðrir hluthafar bankans tapað um 137 milljörðum. Gengi bréfa í bankanum hefur fallið um rétt tæp 60 prósent í morgun.

Ríkið setti inn 84 milljarða í nýju hlutafé í Glitni í gær og eignaðist þar með 75 prósenta hlut í bankanum. Viðskipti ríkisins fóru fram á genginu 1,9 sem er 88 prósentum undir gengi bréfa í Glitni við lokun Kauphallar á föstudag. Nú rétt fyrir hádegi var gengi bréfa í Glitni 6,45 og höfðu bréfin þá lækkað um rétt tæp 60 prósent frá opnun markaða.

Markaðsvirði hlutar ríkisins í Glitni hefur því aukist um 204 milljarða á þeim tveimur tímum sem markaðir hafa verið opnir í morgun. Á sama tíma hafa aðrir hluthafar bankans tapað 137 milljörðum.