Enn fást engin svör frá Seðlabanka Íslands

,,Bankastjórn Seðlabanka Íslands hefur sem stendur engu við það að bæta sem hún lét frá sér fara í gær," er svarið við fyrirspurn frá Vísi í dag um annars vegar skammtímaskiptasamninga í evrum gegn íslenskum veðum og hins vegar hvort óskað hafi verið eftir aðstoð frá bandaríska seðlabankanum.

Fyrirspurnin í heild hljóðar svo: „Ljóst er að Seðlabanki Íslands gæti hæglega boðið upp á skammtímaskiptasamninga í evrum gegn íslenskum veðum til skamms tíma í senn - eins og bankar hafa í raun verið að gera óháð skiptasamningum við seðlabanka Bandaríkjanna."

Þetta er bein tilvitnun í grein í Hálf fimm fréttum greiningar Kaupþings í gær. Hægt er að sjá umfjöllun um málið á vísir.is undir fyrirsögninni: Spyr afhverju Seðlabankinn getur ekki fylgt systurstofnunum.

Spurningin til bankastjóra er: Hefur Seðlabankinn í hyggju að bjóða upp á skammtímaskiptasamninga í evrum gegn íslenskum veðum til skamms tíma í senn?

Í öðru lagi vegna frétta í gær um aðstoð Seðlabanka Bandaríkjanna við seðlabanka á Norðurlöndum. Spurningin til bankastjóra er: Mun Seðlabankinn leita eftir samsvarandi aðstoð frá Seðlabanka Bandaríkjanna og er sú vinna í gangi? Ef ekki, af hverju?"