Microsoft festir gengi krónunnar í 120 fyrir evruna

Microsoft Íslandi hefur náð samkomulagi við höfuðstöðvar Microsoft um að öll viðskipti íslenskra fyrirtækja og almennings við Microsoft muni miðast við að gengi evrunnar sé 120 kr..

Skráð gengisvísitala Seðlabankans stendur nú í u.þ.b. 174 krónum, sem þýðir að Microsoft mun í viðskiptum sínum við íslensk fyrirtæki ganga út frá því að krónan sé u.þ.b. 31% sterkari en hún raunverulega er, með tilheyrandi kjarabótum fyrir íslenskan efnahag.

 

 

Í tilkynningu um málið segir að ástand efnahagslífsins hér á landi sé ástæða þessarar breytingar, en þetta er í fyrsta sinn sem Microsoft beitir þessari aðferð við að koma til móts við þjóð í efnahagskreppu. Fyrirtækið hefur að vísu áður beitt sértækum aðgerðum við slíkar aðstæður, t.d. í Argentínu.

 

 

 

 

Þetta eru ekki einu aðgerðir Microsoft Íslandi til að koma til móts við íslenskt efnahagslíf síðustu vikurnar. Áður hefur komið fram að Microsoft Íslandi fékk sérstaka flýtimeðferð hjá höfuðstöðvum Microsoft við að innleiða svokallað BizSpark-verkefni hér á landi, en það miðar að því að veita sprotafyrirtækjum aðgang að hugbúnaði og þróunartólum án endurgjalds.

 

 

„Microsoft Íslandi hefur trú á íslensku efnahagslífi til lengri tíma, þótt við stöndum frammi fyrir erfiðleikum næstu vikur og mánuði. Það þurfa allir að leggjast á eitt við að halda atvinnulífinu gangandi og þetta er okkar framlag. Stjórnendur í höfuðstöðvum Microsoft höfðu mikinn skilning á þeirri stöðu sem hér er komin upp og það var afar ánægjulegt að sjá hversu langt þeir voru tilbúnir að ganga til að leggja okkur lið í að taka stöðu með krónunni og þar með íslensku atvinnulífi," segir Halldór Jörgensson, framkvæmdastjóri Microsoft Íslandi.