Þýskir bankar eiga þriðjung af erlendum skuldum bankanna

Þýskir bankar voru lánardrottnar að baki tæplega þriðjungi af erlendum skuldum íslenskra banka og annarra hérlendra fyrirtækja um mitt ár. Alls námu kröfur þeirra á hendur íslenskum skuldurum ríflega 21 milljörðum dollara, sem samsvarar rétt um 2.500 milljörðum kr. miðað við skráð gengi Seðlabanka í gær.

Fjallað er um málið í Morgunkorni greiningar Glitnis. Þar sem að ætla megi að þýska fjármálakerfið verði fyrir umtalsverðum skaða í kjölfarið á þroti íslensku bankanna.

Alþjóða greiðslubankinn (BIS) í Sviss birti í morgun tölur um skuldir og kröfur innan hins alþjóðlega fjármálakerfis. Kemur þar fram að erlendar kröfur á íslensk fyrirtæki námu alls ríflega 75 milljörðum dollara um mitt ár eða um 8.000 milljörðum kr.

Alls námu kröfur evrópskra banka á hérlend fyrirtæki í júnílok 42,6 milljörðum dollara. Þetta samsvarar ríflega 56% af öllum erlendum skuldum íslenskra fyrirtækja á þeim tíma.

Greining Glitnis segir að í þessu ljósi, og með hliðsjón af því hversu víðtækar björgunaraðgerðir ríki Evrópu hafa ráðist í til að verja fjármálakerfi sín falli, má velta fyrir sér hvort ekki hafi verið sparaður aurinn og krónunni hent þegar evrópskir seðlabankar ákváðu að veita Seðlabanka Íslands ekki lánafyrirgreiðslu til þess að styðja við bakið á hérlendu fjármálakerfi.

Í öllu falli virðast þær upphæðir sem hér um ræðir, og líklega munu tapast að miklu leyti, talsvert stærri en þær fjárhæðir sem rætt var um þegar Seðlabankinn leitaði á náðir systurbanka sinna í Evrópu varðandi aðstoð fyrr á árinu. Við það bætast svo þau neikvæðu áhrif sem fréttir af bankaáfallinu á Íslandi hafa haft á alþjóðlega fjármálamarkaði, einnig þá sem ekki bera mikinn beinan skaða af áfallinu hér á landi.