Handbært fé ríkissjóðs minnkar um meir en helming

Samkvæmt greiðsluuppgjöri ríkisins fyrstu níu mánuði ársins er handbært fé frá rekstri 19,2 milljarðar kr. innan ársins samanborið við 48,6 milljarða kr. á sama tímabili í fyrra.

Innheimtar tekjur voru 11,6 milljarða kr. hærri en á árinu 2007 en gjöldin voru 49,9 milljarða kr. hærri nú en í fyrra. Hreinn lánsfjárjöfnuður er jákvæður um 27,7 milljarðar kr. sem er 45,6 milljarða kr. betri útkoma en í fyrra.

Innheimtar tekjur ríkissjóðs námu 332 milljarða kr. á fyrstu níu mánuðum ársins sem er 3,6% aukning að nafnvirði. Skatttekjur og tryggingagjöld námu 302 milljarða kr. sem samsvarar 3,6% aukningu að nafnvirði á milli ára.

Frá ársbyrjun hafa veltuskattar skilað ríkissjóði 141 milljarða kr. og dregist lítillega saman að nafnvirði frá sama tíma árið áður. Þegar horft er á 6 mánaða hlaupandi meðaltal nemur raunlækkun veltuskatta nú 15,8% á milli ára sem er mesta raunlækkun um árabil. Þetta er enn ein vísbending um að dregið hefur verulega úr umsvifum í hagkerfinu.

Greidd gjöld nema 318,6 milljörðum kr. Mest aukning er vegna almannatrygginga- og velferðarmála, 14,3 milljarða kr. Þar munar mest um lífeyristryggingar sem hækka um 9 milljarða kr. á milli ára, fæðingarorlofsgreiðslur um 1,2 milljarða kr. og vaxtabætur um 1,4 milljarða kr.