Jón Ásgeir segir sig úr stjórn Magasin og Illum

Jón Ásgeir Jóhannesson hefur sagt sig úr stjórn Magasin og Illum og lætur um leið af stjórnarformennsku í félaginu. Gunnar Sigurðsson forstjóri Baugs í London mun taka við stöðu Jóns Ásgeirs í stjórninni. Jón hefur hinsvegar tekið við sem stjórnarformaður Iceland í Bretlandi.

Þetta kemur fram í frétt á börsen.dk. Þar segir að þessi breyting hafi verið tilkynnt til hlutafélagaskrár Danmerkur. Samhliða þessu mun Donald McCarthy hætta í stjórn Magasin og Illum og í hans stað kemur Andras Szirtes inn í stjórnina.

Baugur keypti sig, ásamt öðrum fjárfestum, inn í Magasin Du Nord og Illum árið 2004.

Börsen segir að mikil óvissa sé nú í kringum þær eignir sem Íslendingar eiga eftir í Danmörku í kjölfar þess að verslunarkeðjan Merlin hefur verið seld og Sterling er orðið gjaldþrota.