Glitnismenn spá 1,2 prósenta vísitöluhækkun

Greining Glitnis spáir 1,2 prósenta hækkun á vísitölu neysluverðs milli ágúst og september.

Segir í Morgunkorninu að þetta sé litlu meiri hækkun en Greiningin hafi reiknað með áður, en ástæðan fyrir því að reiknað sé með meiri hækkun nú sé einkum sú að margt bendi til þess að verð á fötum og skóm hafi hækkað meira í september en áður var gert ráð fyrir auk þess sem hækkun hafi orðið á þjónustutöxtum ýmissa fyrirtækja umfram það sem búist var við í septembermánuði. Greiningin lætur þess getið að gangi þessi spá eftir muni ársverðbólga lækka úr 14,5 prósentum í 14,4.