Krefjast upplýsinga um peningamarkaðssjóði fyrir dómstólum

Hópur fyrrum eigenda hlutdeildarskírteina í peningamarkaðssjóði Landsbankans krefst upplýsinga um fjárfestingar sjóðsins vegna þeirrar miklu skerðingar sem varð á eign þeirra þegar sjóðnum var slitið. Þegar eigendur fengu greitt úr sjóðnum fegnu þeir einungis tæp 69% af eigum sínum greiddar til baka. Lögmaður þessara aðila, Jóhann H. Hafstein, hjá ERGO lögmönnum, lagði í gær fram beiðni til Héraðsdóms Reykjavíkur þar sem óskað er eftir skýrslutökum og að lögð verði fram gögn sem geti skýrt fjárfestinar sjóðsins og hvort þær hafi farið á svig við kunngerða fjárfestingarstefnu hans og lög um fjárfestingarsjóði.

„Ég tel fullvíst að fallist verði á öll atriði beiðninnar. Ég er þeirrar skoðunar að þeir sem áttu hlutdeildarskírteini í peningamarkaðssjóði eigi ótvíræðan rétt á upplýsingum um fjárfestingar sjóðsins enda áttu þeir beina aðild að honum sem eigendur hlutdeildarskírteina. Vegna þessa er hæpið að röksemdir sem lúta að bankaleynd eigi við í tilviki peningamarkaðssjóða," segir Jóhann.

Jóhann vísar sérstaklega til þess að forsvarsmenn Landsvaka hf., sem er dótturfélag Landsbankans og rak sjóðinn, hafi ekki svarað fyrirspurnum hans um fjárfestingar sjóðsins og ójóst sé hvaða eignir sjóðurinn átti. Því sé nauðugur sá kostur að senda slíka beiðni til héraðsdóms. Því sé um að ræða öflun sönnunargagna áður en dómsmál sé höfðað. „Mikilvægi þessara upplýsinga lýtur einkum að skoðun á réttarstöðu þessara aðila og á hvaða málsástæðum hugsanleg dómsmál kunna að verða reist" segir Jóhann að lokum.