Glitnislán gjaldféll í dag

Lán Glitnis banka að andvirði 83,3 milljarðar íslenskra króna eða 750 milljónir bandaríkjadala gjaldféll í dag. Reuters fréttastofan segir að þetta verði fyrsta lánið sem Glitnir greiðir ekki af frá því að skilanefnd tók rekstur bankans yfir, en Fjármálaeftirlitið neitaði að tjá sig um það við Reuters hvort lánið yrði greitt.

Glitnir er nú í greiðslustöðvun en matsfyrirtækið Standard & Poor´s segist gera ráð fyrir að Glitnir muni ekki standa í skilum við lánadrottna sína utan Íslands þegar lán gjaldfalla. Heildarskuldir Glitnis nema 2600 milljörðum íslenskra króna 23,4 milljörðum bandaríkjadala.

Heildarupphæð erlendra skulda bankanna þriggja, sem gjaldfalla til áramóta nemur 1650 milljörðum íslenskra króna eða 11 milljörðum evra.