Hugsanlegt að Hollendingar hafi fengið rangar upplýsingar frá íslenskum eftirlitsstofnunum

Hugsanlegt er að hollenski Seðlabankinn hafi fengið rangar upplýsingar frá íslenskum eftirlitsaðilum varðandi stöðu íslenskra banka. Þetta hefur hollenska fréttastofan ANP eftir Wouter Bos, hollenska fjármálaráðherranum.

Í hollenskum fjölmiðlum er fullyrt að Seðlabankinn þar í landi hafi viljað grípa til aðgerða gagnvart Icesave Netbanka Landsbankans en slíkt hefði brotið í bága við lög og reglugerðir. Slíkt hefði jafnframt getað stuðlað að því að áhlaup yrði gert á bankanna á Íslandi, samkvæmt upplýsingum frá Seðlabankanum í Hollandi. Hollensk yfirvöld hafi því ekki getað brugðist við.