Samkeppniseftirlitið samþykkir samruna Kaupþings og SPRON

Samkeppniseftirlitið hefur samþykkt samruna Kaupþings og SPRON eftir því sem fram kemur á heimasíðu eftirlitsins.

Þar segir að eftirlitið hafi metið fjárhagsstöðu SPRON, möguleikann á að einhver annar kaupi sparisjóðinn og samkeppnisleg áhrif þessa alls. Ljóst sé að brotthvarf SPRON af markaði sem sjálfstæðs keppinautar skapi umtalsverðar samkeppnishömlur en að samruninn sé óhjákvæmilegur miðað við þær aðstæður sem SPRON er í, þar sem félagið myndi ella hverfa af markaðnum sem sjálfstæður keppinautur. Því sé engin önnur niðurstaða tæk en að heimila samrunann. Þetta þýðir að nú vantar aðeins samþykki Fjármálaeftirlitsins fyrir því að bankarnir tveir sameinist.

Þá hefur Samkeppniseftirlitið samþykkt kaup 70 prósenta stofnfjárhlut í Sparisjóði Mýrasýslu. Bent er á að eftir samrunann verði ekki annar banki í Borgarnesi og nærsveitum og munu neytendur í Borgarnesi því ekki hafa annan valkost í sinni heimabyggð. „Samkeppniseftirlitið telur að brotthvarf SPM af markaðnum sem sjálfstæður keppinautur sé til þess fallið að hamla samkeppni. Þrátt fyrir þetta er það niðurstaða Samkeppniseftirlitsins að erfið staða SPM leiði til þess að engin önnur niðurstaða sé tæk í málinu en að heimila samrunann," segir í tilkynningunni.