Nýi Landsbankinn langstærstur

Nýi Landsbankinn er nú langstærstur bankanna þriggja sem voru þjóðnýttir. Heildareignir bankans nema nú um 2.300 milljörðum króna og eigið fé nemur 200 milljörðum króna.

Efnahagsreikningur Nýja Glitnis verður um 1.200 milljarðar króna og eigið fé 110 milljarðar króna. Eigið fé Nýja Kaupþings verður 75 milljarðar króna og stærð efnahagsreikningsins verður um 700 milljarðar króna. Nýi eigandi bankanna, íslenska ríkið, leggur bönkunum til eigið fé. Þetta kemur fram í Hálf-fimm fréttum Kaupþings.

Heildareignir Nýja Kaupþings 11% af eignum þess gamla



Greiningadeild Kaupþings segir að eigið fé Nýja Landsbankans verði það sama og eigið fé gamla bankans hafi verið í lok júní síðastliðinn eða um 200 milljarðar króna. Þá séu eignir Nýja Landsbankans tæp 60% af eignum gamla bankans en eignir Nýja Kaupþings séu aðeins 11% af gamla bankanum. Þá segir að eignir Nýja Glitnis séu þriðjungur af gamla bankanum.

Í Hálf-fimm fréttum Kaupþings segir að heildareignir nýju bankanna séu nú þreföld landsframleiðsla ef miðað sé við landsframleiðslu ársins 2007. Fyrir fall bankanna hafi eignir þeirra numið rúmlegri tífaldri þjóðarframleiðslu

Óháðir aðilar meta eignir bankanna

Greiningadeild Kaupþings segir að á næstu 90 dögum muni fara fram mat óháðs aðila á verðgildi eigna og skulda og lokauppgjör hjá Kaupþingi. Hins vegar sé gert ráð fyrir að þetta endurmat taki 60 daga hjá Glitni og 30 daga hjá Landsbankanum.