Geir óskar formlega eftir lánum hjá Norðurlandaþjóðunum

Geir Haarde forsætisráðherra staðfesti í dag að óskað hafi verið formlega eftir lánum frá hinum Norðurlöndunum Svíþjóð, Danmörku, Noregi og Finnlandi. Þetta kom fram á blaðamannafundi í Helsinki að loknum fundum ráðherra á Norðurlandaráðsþingi.

„Við höfum lagt inn beiðnir til allra landanna," sagði Geir á fundinum en hann vildi ekki gefa upp um hve háar upphæðir væri að ræða. Ástæðu þess sagði Geir vera að hann vildi ekki setja þrýsting á mögulega lánveitendur.

Í viðtali við finnska dagblaðið Helsingin Sanomat sagði Geir að gott væri ef Íslendingum tækist að fá fjóra milljarða dollara til viðbótar við það sem Alþjóðagjaldeyrissjóðurinn hefur lofað.