Grunnur lagður að sterkara fyrirtæki

„Ætla má að samanlagt markaðsverðmæti Glitnis og Byrs sé um 281 milljarður króna. Markaðsvirði Glitnis er um 223 milljarðar en Capacent ráðgjöf mat Byr á 58,2 milljarða króna við breytingu í hlutafélag,“ segir í hálffimmfréttum greiningardeildar Kaupþings.

Formlega var upplýst um samrunaviðræður Glitnis og Byrs í tilkynningu til Kauphallar í gær.

Fram kemur að stjórnir félaganna hafi skuldbundið sig til að ræða ekki við aðra aðila um samstarf eða sameiningar á meðan þessar viðræður standi yfir. Niðurstaða á að liggja skjótt fyrir. Í tilkynningu fyrirtækjanna er haft eftir Lárusi Welding, forstjóra Glitnis, að með viðræðunum sé kannaður grundvöllur fyrir sameiningu. „Náist niðurstaða sem báðum er að skapi, er lagður grunnur að enn sterkara fyrirtæki sem er vel í stakk búið til að athafna sig í því árferði sem nú ríkir á markaði.“

Þá er haft eftir Ragnari Z. Guðjónssyni, sparisjóðsstjóra Byrs, að félagið standi sterkt þrátt fyrir ágjöf síðustu mánaða. Stjórn félagsins hafi skoðað vandlega þá kosti sem í stöðunni væru og telji að styrkur Byrs verði best nýttur í samstarfi við öflugt fyrirtæki á íslenskum og alþjóðlegum fjármálamörkuðum.