Þrjátíu milljónir til skiptanna

Ólíklegt er að kröfur berist í bú Verðbréfaþjónustu sparisjóðanna (VSP) sem nú er í slitameðferð, að sögn Erlu S. Árnadóttur lögmanns sem skipuð er skiptastjóri.

„Innköllunarfrestur er í gangi, en hann var ákveðinn sex mánuðir.“ Hefðbundinn innköllunarfrestur er tveir mánuðir, en Erla kveðst hafa ákveðið að nýta heimild til framlengingar þar sem verið gæti að kröfur væru í búið erlendis. „Enn sem komið er hafa hins vegar engar kröfur borist.“

Erla segir því ekki útséð með að félagið sé gjaldþrota, þótt það sé að forminu til í gjaldþrotaskiptum. „Félagið á eignir á bankareikningi upp á 30 milljónir króna.“

Þótt VSP sé í slitameðferð er það ekki vegna þess að félagið standi ekki undir kröfum, heldur var starfsemi hætt eftir að Byr keypti rekstur þess undir lok síðasta árs. Til þess að slit geti farið fram kveða lögin á um að fram skuli fara gjaldþrotaskipti, að sögn Erlu.

Verði eignir VSP til úthlutunar þá verður þeim úthlutað til hluthafa, en félagið var, líkt og nafnið gefur til kynna í eigu sparisjóðanna. Skiptafundur verður, samkvæmt auglýsingu í Lögbirtingarblaðinu, um miðjan janúar næstkomandi.

Líkast til verður þá einnig komið í ljós hvort ábyrgðir fyrir um 200 milljónir Bandaríkjadala verða bindandi fyrir VSP, en ríkissaksóknari telur að þær geti fallið á félagið. Í byrjun vikunnar var staðfestur í Hæstarétti farbannsúrskurður yfir fyrrverandi framkvæmdastjóra félagsins sem sakaður er um brot í starfi.