Aðeins tvö ný íbúðalán á dag

Innlánsstofnanir gáfu út 43 íbúðalán í ágúst sem jafngildir um tveimur lánveitingum á dag þá tuttugu viðskiptadaga sem voru í mánuðinum. Þetta kemur fram í Hálf-fimm fréttum Kaupþings.

Heildarupphæðin var 483 milljónir eða tæpur 1/10 af útlánum Íbúðalánasjóðs í sama mánuði í fyrra samkvæmt upplýsingum frá Seðlabanka Íslands og mánaðarskýrslu Íbúðalánasjóðs. Samkvæmt skýrslu Íbúðalánasjóðs voru almenn útlán 4,3 milljarðar króna og meðalútlán 10,9 milljónir króna sem benda til að lánveitingar hafi verið í kringum 400.

Íbúðalán innlánsstofnana hafa dregist jafn og þétt saman á þessu ári og hafa síðustu þrjá mánuði verið á svipuðu róli í kringum 45 lán á mánuði. Meðallánsupphæð hækkaði hins vegar nú í ágúst frá júlí og var 11,2 milljónir króna.