Rífandi gangur í framleiðslu pokabeitu í Súðavík

Pokabeituframleiðsla á vegum beituverksmiðjunnar Bernskunnar í Súðavík hefur gengið mjög vel í sumar og hefur framleiðslan numið 80-90 þúsund beitum á dag, að sögn Sveinbjörns Jónssonar, framkvæmdastjóra fyrirtækisins.

Fjallað er um málið á vefsíðunni Interseafood.com. "Verksmiðjan hefur verið að framleiða 80-90 þúsund beitur á dag og hefur allt selst sem hefur verið framleitt," segir Sveinbjörn.

"Það voru erfiðleikar í framleiðslunni í sumar vegna bilanna í vélum en það er allt komið í lag," segir Sveinbjörn.

"Það starfa fimm manneskjur við beituverksmiðjuna og eru það þýðingarmikil störf fyrir svona lítið sveitarfélag. Við framleiðum aðallega makrílbeitu sem virkar mjög vel á ýsuna og svo erum við að gera tilraunir með nýjar beitutegundir sem kemur í ljós síðar hvað verður," segir Sveinbjörn.