Hörð gagnrýni á Seðlabankann hjá greiningu Kaupþings

Hörð gagnrýni kemur fram á Seðlabanka Íslands hjá greiningu Kaupþings í dag þegar hún kynnti efnahagshorfur sínar. Þar segir m.a. að Seðlabankinn hafi ekki nýtt tíman undanfarna sjö mánuði til að efla lausafjárstöðu hagkerfisins.

"Nú eru um 14 mánuðir frá því að lausafjárkrísan hófst á erlendum mörkuðum og 7 mánuðir frá því að stýrivextir Seðlabankans urðu óvirkir á gjaldeyrismarkaði," segir greiningin. "Það eru allir málsmetandi aðilar sammála - innlendir sem erlendir - að gjaldeyrisvaraforði íslenska Seðlabankans sé of lítil fyrir íslenska hagkerfið. Samt hefur þessi tími ekki verið nýttur til þess að efla lausafjárstöðu hagkerfisins nema að mjög takmörkuðu leyti."

Greining segir að þess í stað hafi Seðlabankinn reynt að styrkja krónuna fyrst með því að berja áfram óvirkan vaxtamarkað með hækkun stýrivaxta og síðan að þrengja enn frekar að lausafjárstöðu á fjármálamarkaðinum með útgáfu ríkistryggðra bréfa.

"Þetta er töluverður skaði þar sem slík lausafjáröflun hefur orðið dýrari með hverjum mánuðinum sem liðið hefur af krísunni," segir greiningin. "Aukin heldur takmarkar skortur á erlendu lausafé mjög möguleika íslenskra stjórnvalda að hafa áhrif á gang mála á íslenskum fjármálamörkuðum."