Gjaldþrot og atvinnuleysi blasir við

Við höfum rétt séð toppinn á því sem koma skal og það er alveg ljóst að ríkisvaldið hefur gert alvarleg mistök, segir Jón Ásgeir Jóhannesson, stjórnarformaður Baugs. Hann segir gjaldþrot fyrirtækja blasa við og að fjöldi fólks muni missa vinnuna á komandi mánuðum.

Samkvæmt Morgunblaðinu hellti Jón Ásgeir sér yfir viðskiptaráðherra, Björgvin G. Sigurðsson á dögunum vegna aðgerða ríkisstjórnarinnar. Þessu neitar Jón Ásgeir. „Nei, ég er nú ekki maður sem helli mér mikið yfir fólk en ég hins vegar benti á það að í okkar samtali að hér væru hlutir að gerast sem myndu hafa ákveðinn dómínóeffekt eins og það er kallað, það er að segja það væri alveg vitað að svona aðgerð myndi snerta hina bankana sem væri mjög miður af því að það eru líka mjög góð fyrirtæki. Ég sagði við hann að þessir 80 milljarðar sem er verið að setja á borðið eru hneta miðað við það sem mun tapast á þessari aðgerð," segir Jón Ásgeir.

Hann bætir við að hann hafi sagt viðskiptaráðherra „að vinna svona hratt svona aðgerð án þess að leggja fyrir menn plan hvaða áhrif þetta hefur. Það virðist ekkert hafa verið hugsað út í það."