Guðmundur staðfestir viðræður við GOG

Danska handboltafélagið GOG hefur sett sig í samband við íslenska landsliðsþjálfarann Guðmund Guðmundsson með það fyrir augum að taka við þjálfun liðsins á næstu leiktíð.

Guðmundur staðfesti þetta í samtali við fréttastofu Stöðvar 2 í dag en danska daglaðið BT greindi fyrst frá þessu í gærkvöld.

Í frétt blaðsins segir að Guðmundur muni taka við liðinu næsta sumar af Ulf Schefvert sem ætlar að taka við kennaliði félagsins.

Samkvæmt heimildum fréttastofu Stöðvar 2 hafa lið í Þýskalandi einnig horft til Guðmundar í ljósi árangurs hans með íslenska landsliðið á ólympíuleikunum.

Guðmundur segir viðræðurnar við GOG á algerum byrjunarreit og í raun allt of snemmt að tjá sig nokkuð um þær, hann hafi ekki rætt málið af það mikilli alvöru við danska félagið.

Guðmundur segir fulldjúpt í árina tekið með að halda því beinlínis fram að hann verði þjálfari liðsins næsta sumar eins og BT gerir í frétt sinni.

Aðspurður um hvort hann myndi stýra íslenska landsliðinu samhliða þjálfun félagsliðs í Evrópu, sagði Guðmundur að það yrði eitthvað sem hann myndi skoða ef til þess kæmi.

Með GOG leika tveir íslenskir landsliðsmenn, þeir Snorri Steinn Guðjónsson og Ásgeir Hallgrímsson.