Segir að Ísland gæti fengið ESB-aðild 2010 og evru 2013

Aðalsteinn Leifsson, lektor við Háskólann í Reykjavík, telur að ef Ísland myndi sækja um aðild að Evrópusambandinu (ESB) á þessu ári mætti búast við að aðild yrði að veruleika í byrjun árs 2010 og að hægt væri að taka upp evruna þremur árum síðar eða árið 2013.

Greining Glitnis fjallar um málið í Morgunkorni sínu. Þar kemur fram að Aðalsteinn situr í Evrópunefnd forsætisráðuneytisins sem nýlega fór til Brussel að hitta ráðamenn ESB.

Aðalsteinn dregur framangreinda ályktun út frá samræðum sem nefndin átti við Olli Rehn sem er framkvæmdarstjóri stækkunarmála hjá framkvæmdastjórn ESB. Þetta kom fram á ráðstefnu um Evrópumál sem Samtök iðnaðarins og Starfsgreinasambandið stóðu fyrir í gær.

Aðalsteinn sagði auk þess að aðild Íslands að ESB myndi hafa í för með sér efnahagstöðugleika, lægri vaxtakostnað og matvælaverð hér á landi.

Finninn Daniel Valtakari, sérfræðingur hjá norrænum verkalýðsamtökum, staðfesti að það hefði verið raunin í Finnlandi við inngöngu í ESB. Mikill efnahagslegur óstöðugleiki ríkti í Finnlandi áður en landið gerðist aðili að ESB og tók upp evru en nú væri raunin önnur.