Saka Seðlabankann um eignaupptöku

Stjórn Stoða, stærsta hluthafa Glitnis, sakar Seðlabankann um eignaupptöku og segir hluthafa Glitnis hafa tapað á annað hundrað milljörðum á aðgerðum stjórnvalda í dag.

Þetta kemur fram í tilkynningu frá stjórninni. Þar segir enn fremur að í kjölfar þvingaðrar yfirtöku Seðlabankans og ríkisvaldsins á Glitni hafi stjórn Stoða óskað eftir greiðslustöðvun. ,,Ef yfirtakan verður samþykkt á hluthafafundi Glitnis lætur nærri að eignarhlutur Stoða í Glitni lækki um 50 milljarða króna. Eigið fé Stoða nam um 87 milljörðum króna við lok annars ársfjórðungs og fjárhagsstaða Stoða er því í miklu uppnámi," segir enn fremur í tilkynningunni. Þar kemur enn fremur fram að héraðsdómur hafi heimilað greiðslustöðvun til 20. október.

Þá átelur stjórn Stoða harðlega vinnubrögð bankastjórnar Seðlabankans. ,,Ljóst má vera að Glitnir þurfti á aðstoð Seðlabankans að halda vegna lausafjárvanda sem bar brátt að. Rekstur Glitnis hefur hins vegar verið með ágætum, bankinn skilað góðum hagnaði og eigið fé Glitnis nam um 200 milljörðum króna um mitt þetta ár. Það er mat stjórnar Stoða að Seðlabankinn hafi haft aðra og farsælli kosti í stöðunni en að taka Glitni yfir. Harkalegt inngrip Seðlabankans er ekkert annað en eignaupptaka þar sem hluthafar Glitnis tapa vel á annað hundrað milljörðum króna," segir í tilkynningunni.

Þá segja Stoðamenn að Seðlabankinn og ríkisstjórnin hafi stillt stjórn og stærstu eigendum Glitnis upp við vegg í skjóli nætur og þeir hafi því ekki átt aðra kosti en að samþykkja tillöguna. ,,Atburðarásin var með þeim hætti að ekkert tóm gafst til að leita annarra lausna, frekar en að meta heildaráhrif aðgerðanna á íslenskt fjármálalíf. Stjórn Stoða harmar þessar aðgerðir og lýsir fullri ábyrgð á afleiðingum þeirra á hendur bankastjórnar Seðlabankans.," segir í tilkynningunni.