Greiðslustöðvun Stoða hf hefur engin áhrif á TM

Greiðslustöðvun Stoða hf hefur engin áhrif á starfsemi Tryggingamiðstöðvarinnar, að sögn Sigurðar Viðarssonar, forstjóra TM. Stoðir eru einn helsti eigandi Tryggingamiðstöðvarinnar en Stoðir óskuðu eftir því við Héraðsdóm Reykjavíkur í morgun að félaginu yrði veitt heimild til greiðslustöðvunar.

„Þetta hefur í sjálfu sér engin áhrif á okkur í dag," segir Sigurður í samtali við Vísi. „Við erum eftir sem áður gríðarlega sterkt félag með 30% eiginfjárhlutafall og getum staðið við þær skuldbindingar sem við höfum," segir Sigurður. Hann benti þó á að erfitt væri að spá fyrir um hvert framhaldið yrði.