Novator Credit Fund fær Creditflux verðlaunin

Novator Credit Fund, vogunar- og skuldasjóður Novators, hlaut í gærkvöldi árleg verðlaun tímaritsins Creditflux eins virtasta og útbreiddasta tímarits Evrópu sem einbeitir sér að lánamörkuðum. Novator fær verðlaunin í flokknum „best credit opportunity fund", eða „besti tækifærissjóðurinn".

Novator Credit Fund var stofnaður árið 2005 og sýslar með 500 milljónir Bandaríkjadala, eða sem nemur tæplega 46 milljörðum króna. Hann var eini sjóðurinn af þeim sem tilnefndir voru í fyrrnefndum flokki sem skilaði hagnaði á fyrri hluta ársins 2008. Sjóðstjóri hans er Adrian Kingshott, sem áður stýrði þeirri deild Goldman Sachs Group Inc. sem sá um fjármögnun skuldsettra yfirtaka.

„Það er sannarlega ánægjulegt að hljóta þessi virtu verðlaun og staðfesting á þeim góða árangri sem Novator hefur náð í markaðsviðskiptum á undanförnum misserum. Eins og flestum er kunnugt hafa aðstæður á alþjóðlegum fjármálamörkuðum verið sérstaklega óhagstæðar að undanförnu, enda hefur ríkt lánsfjárkreppa í efnahagslífi heimsins, og því hefur reynt á færni sérfræðinga okkar í markaðsviðskiptum." Segir Björgólfur Thor Björgólfsson, eigandi Novators í tilkynningu um málið.