Kinnear stýrir Newcastle til vors

Joe Kinnear er búinn að skrifa undir samning við stjórn Newcastle um að stýra liðinu til loka leiktíðar. Hann hefur verið settur stjóri Newcastle síðan Kevin Keegan hætti í september.

"Ég hef haft gaman af þessu alveg síðan ég kom hingað til Newcastle," sagði Kinnear þegar ljóst varð að hann sæti í sex mánuði í viðbót hjá félaginu.

Kinnear hefur þó verið duglegur að koma sér í fréttirnar og stundum á röngum forsendum. Hann hefur tvisvar farið inn á teppi hjá aganefndinni.

Í fyrra skiptið var hann aðvaraður eftir að blóta 52 sinnum í árás á fjölmiðlamenn á blaðamannafundi en síðar fyrir að kalla dómara Mikka Mús eftir tapleik gegn Fulham.

Kinnear hefur unnið tvo leiki, gert fjögur jafntefli og tapað tveimur í þeim átta leikjum sem hann hefur stýrt liðinu.