Ótrúlegur síðari hálfleikur hjá Ciudad Real

Ciudad Real gerði sér lítið fyrir og vann nítján marka sigur á öðru spænsku stórliði, Portland San Antonio, 42-23, í spænsku úrvalsdeildinni í gær.

Staðan í fyrri hálfleik var 17-15, Ciudad Real í vil, en Ólafur Stefánsson og félagar hreinlega keyrðu yfir andstæðinga í þeim síðari þar sem Ciudad Real skoraði 25 mörk gegn aðeins átta frá Portland.

Ólafur skoraði fimm mörk í leiknum, þar af tvö úr vítum. Ciudad Real er nú í þriðja sæti deildarinnar með fjórtán stig, rétt eins og Portland. Ademar Leon er enn á toppnum með sautján stig, einu stigi meira en Barcelona.