FME hefur tekið við rekstri Kaupþings

Á grundvelli nýsettra laga grípur Fjármáleftirlitið inn í rekstur Kaupþings til að tryggja áframhaldandi viðskiptabankastarfsemi á Íslandi.

Í tilkynningu um málið segir að bankainnlán á Íslandi eru að fullu tryggð, eins og ríkisstjórnin hefur lýst yfir. Útibú bankans á Íslandi, þjónustuver, hraðbankar og netbankar eru opnir í dag og að aðgerðirnar séu gerðar til að tryggja eðlilega bankastarfsemi innanlands

Fjármálaeftirlitið hefur skipað skilanefnd sem tekur við öllum heimildum stjórnar Kaupþings. Þetta er gert til að tryggja fullnægjandi innanlandsstarfsemi bankans og stöðugleika íslensks fjármálakerfis.

Eins og ríkisstjórnin hefur lýst yfir eru innstæður í innlendum viðskiptabönkum, sparisjóðum og útibúum þeirra hér á landi tryggðar að fullu. Útibú bankans á Íslandi, þjónustuver, hraðbankar og netbankar eru opnir. Stefnt er að því að viðskiptavinir bankans finni sem minnst fyrir breytingum.

Það er mat Fjármálaeftirlitsins að þessi aðgerð sé nauðsynlegt fyrsta skref til þess að ná markmiðum nýsettra laga og til að tryggja eðlilega bankastarfsemi innanlands og öryggi innstæðna á Íslandi.

Eftirfarandi aðilar hafa verið skipaðir í skilanefnd: Finnur Sveinbjörnsson, hagfræðingur, Knútur Þórhallsson, löggiltur endurskoðandi, Bjarki H. Diego, hrl, Guðný Arna Sveinsdóttir, viðskiptafræðingur og Steinar Þór Guðgeirsson, hrl.