Íslenska lífeyrissjóðnum lokað tímabundið

Íslenski lífeyrissjóðurinn verður vegna þeirra sérstöku aðstæðna sem nú eru á mörkuðum að loka í nokkra daga fyrir útgreiðslu úr sjóðnum og flutninga milli fjárfestingaleiða sjóðsins og annarra vörsluaðila.

Þetta kemur fram á heimasíðu Landsbankans. Þar segir að þar sem viðskipti í Kauphöll eru ekki leyfð er ekki hægt að reikna gengi fjárfestingaleiða. Nauðsynlegt er að grípa til þessara ráðstafanna til að gæta hagsmuna allra sjóðfélaga.

Unnið er að því að fá rétta mynd af verðmæti eigna Íslenska lífeyrissjóðsins og grípa til þeirra ráðstafana sem tækar eru til að hámarka verðmæti þeirra. Óskað hefur verið eftir því að endurskoðandi sjóðsins aðstoði við að meta eignir sjóðsins.

Lokunin er tímabundin og verður tilkynning send út um leið og opnað verður fyrir útgreiðslur og flutninga milli fjárfestingaleiða.

Sjóðfélagar eru beðnir velvirðingar á þeim óþægindum sem þetta kann að valda þeim.