Niðursveiflan verður út næsta ár að mati Glitnis

Greiningardeild Glitnis gerir ráð fyrir að niðursveilfan hér á landi muni standa út næsta ár en að hagkerfið taki aftur við sér árið 2010. Enn fremur telur greiningardeildin að íslenska fjármálakerfið standist þá ágjöf sem nú einkennir hið alþjóðlega fjármálakerfi. Þetta var meðal þess sem fram kom á morgunverðarfundi greiningardeildarinnar þar sem kynnt var þjóðhagsspá fyrir árin 2008-2011.

Fram kom í máli Jóns Bjarka Bentssonar, hagfræðings hjá greiningardeild Glitnis, að síðustu fimm ár hefðu verið uppgangstími í íslensku efnahagslíf sem hefðu einkennst af miklum hagvexti og almennri velmegun. Þetta hefði meðal annars verið ávöxtur umfangsmikilla kerfisbreytinga og stóriðju. Við þetta hefði bæst almenn neyslugleði sem drifin hefði verið áfram af kaupmáttaraukningu. „Þetta skeið er nú á enda og við tekur aðlögun," sagði Jón Bjarki og bætti við að hún væri tímabær og nauðsynleg.

Hann sagði enn fremur að greiningardeild Glitnis hefði lagst yfir tölur og söguna og út frá því teldi hún að lendingin í íslensku hagkerfi sem yrði tiltölulega farsæl. Bankinn spáði því að landsframleiðsla yrði óbreytt frá síðasta ári á þessu ári og einnig því næsta. Þjóðarútgjöldin myndu dragast saman á þessum árum eftir geysimikinn vöxt undanfarin ár og fyrirtæki og heimili þyrftu að herða sultarólina. Heimilin væru hins vegar vel búin undir niðursveiflu því þau hefðu notið kaupmáttaraukningar og hækkandi eignvaverðs.

Greiningardeildin gerir enn fremur ráð fyrir að einkaneysla taki aftur við sér árið 2010 með styrkari krónu og meira jafnvægi í utanríkisviðskiptum. Horfur séu á ágætum hagvexti í framhaldinu án þess að til komi sú spenna og sú þensla sem einkennt hafi síðustu ár.