Kaupþing segir lífeyriseigur tryggar

Inneign sjóðfélaga í lífeyrisafurðum Kaupþings er aðskilin eignum bankans og ekki er hægt að ráðstafa henni upp í skuldbindingar bankans. Þetta þýðir að eignir sjóðanna eru eignir sjóðfélaga en ekki bankans. Þetta kemur fram í orðsendingu frá Kaupþingi í ljósi þess að Fjármálaeftirlitið hefur tekið yfir rekstur Kaupþings.

Réttindi ekki skert á næsta ári

Þá segir að miðað við núverandi stöðu sé ólíklegt að tryggingadeild Frjálsa lífeyrissjóðsins þurfi að grípa til skerðingar á réttindum og lífeyri sjóðfélaga á næsta ári vegna lækkunar á verðbréfamörkuðum. Eignastýring Kaupþings hafi á þessu ári kerfisbundið minnkað áhættu í fjárfestingarleiðum lífeyrisafurða Kaupþings. Áhættumeiri verðbréf hafi verið seld og í staðinn hafi m.a. verið keypt verðtryggð ríkisskuldabréf. Aðgerðirnar leiði til þess að lækkun á ávöxtun fjárfestingarleiðanna, vegna væntanlegs gengisfalls verðbréfa Glitnis, Kaupþings og Landsbankans, verði minni en ella.

Hvetja sjóðfélaga til að greiða áfram iðgjöld

„Sjóðfélagar þurfa ekki að óttast að iðgjöld sem hafa verið greidd frá og með 6. október sl. og iðgjöld sem berast sjóðnum framvegis tapist eða lækki í verði vegna væntanlegs gengisfalls verðbréfa Glitnis, Landsbankans og Kaupþings. Iðgjöld sem berast fara nú tímabundið inn á innlánsreikninga, sem ríkið hefur ábyrgst," segir í orðsendingunni.