Fiskkaupmenn í Hull og Grimsby geta það sem SÍ getur ekki

Fiskkaupmenn i Hull og Grimsby geta það sem Seðlabanki Íslands getur ekki. Komið á gjaldeyrismiðlun milli Bretlands og Íslands.

Sökum þess að íslenskir fiskútflytjendur eru hættir að senda fisk til Bretlands því ekki er hægt að millifæra gjaldeyri milli landanna stefndi í óefni hjá fjölda af veitingastöðum sem selja fisk og franskar í norðausturhluta Englands.

Fiskkaupmenn í Hull og Grimsby sáu að við svo búið mátti ekki standa. Samkvæmt frásögn á vefsíðunni Fishupdate.com höfðu þeir samband við þingmann sinn, Austin Mitchell, og síðan var bankað upp á hjá Englandsbanka.

Fór svo að Englandsbanki gaf nokkrum breskum bönkum skipun um að leysa gjaldeyrisstífluna svo koma mætti íslenskum fiski til fyrrgreindra veitingastaða í gegnum fiskmarkaðina í Hull og Grimsby.

Steve Norton, formaður samtaka fiskkaupenda í Grimsby, segir að þeir hafi unnið af alefli við að fá gjaldeyrisviðskiptin í gang. „Við flytjum inn 27.000 tonn af fiski frá Íslandi árlega og því hætta á atvinnuleysi meðal félagsmanna okkar ef þetta ástand varir lengi," segir Norton. „Fiskmarkaðurinn hér hefði stoppað ef staðirnir sem selja fisk og franskar hefðu ekki getað fengið neinn fisk frá okkur."