Kallinn fluttur til geðhjúkrunarfræðingsins

„Ég vil þakka fyrir titilinn símtal ársins á Bylgjunni," segir konan sem hringdi inn á Bylgjuna á dögunum og upplýsti hlustendur um bólfarir mannsins síns með geðhjúkrunarfræðingi á Landspítalanum.

Konan sem er 51 árs gömul er listmálari og býr í Breiðholtinu en símtal hennar í Reykjavík síðdegis á dögunum vakti mikla lukku og gekk manna á milli á netinu.

Konan segir að viðbrögðin við símtalinu hafi gefið sér mikið. „Þetta er búið að halda mér á floti og það er gaman að heyra hvernig fólk hefur tekið í þetta, mér hefur verið hrósað og ég hef heyrt það meðal annars á hárgreiðslustofum bæjarins."

Konan vill þó halda nafni sínu leyndu en hefur þó meiri upplýsingar um geðhjúkrunarfræðinginn sem er að sofa hjá manninum hennar. „Hún er 177cm, ljóshærð og býr í miðbænum. Hún er víst alveg hrikalega geðvond og er að reyna að sálgreina manninn minn. Hann býr núna hjá henni en er að sofa hjá mér," segir konan sem heldur því fram að geðhjúkrunarfræðingurinn sé að sálgreina manninn.

„Hún er að reyna að hafa eitthvað upp úr honum og þykist vita hvað hann er að hugsa, hann fær ekki einu sinni að hugsa sjálfstætt."

Konan segist hafa heyrt í manninum sínum í morgun og hafi hann þá verið hinn hressasti. „Hann sagði mér að hún hefði verið í geðveiku skapi í gærkvöldi."

Hægt er að hlusta á umræddan símatíma í Reykjavík síðdegis í spilaranum hér fyrir ofan. Konan hringir inn eftir um fjórar mínútur.

Aðspurð hvers vegna hún hafi hringt inn á Bylgjuna til þess að deila ástandinu á heimilinu með fólki segir listmálarinn. „Það var nú bara þörfin fyrir það að láta þetta heyrast og láta fólkið í þjóðfélaginu vita hvað sé í gangi. Þetta er hið dularfyllsta mál en það hefur hjálpað mér hvað fólk er að taka þessu vel."

Konan segist hafa verið í sambúð með manninum í fimm ár en hún er heimavinnandi listmálari með tvo unglinga. „Geðhjúkrunarfræðingurinn hitti hann bara á einhverjum bar og sá aumingjasvipinn á honum. Ætli hún hafi ekki séð að hún gæti stjórnað hugsunum hans," segir konan en ekkert hefur verið ákveðið hjá hvorri konunni þessi kvensæli maður muni eyða áramótunum.

„Ég ætla nú að reyna að vinna hann tilbaka enda er þetta góður maður. Hann hefur auðvitað sýnt tvöfeldni í þessu máli en ég er alltaf til í að fyrirgefa."