Biðlistar eftir hjúkrunarrými

Samfylkingin kveinkar sér undan umræðu um ábyrgð flokksins á biðlistum eftir hjúkrunarými í Reykjavík. Slík grein birtist hér á þessum vettvangi 17. apríl eftir Guðríði Arnardóttur, bæjarfulltrúa Samfylkingarinnar í Kópavogi.

Í 38. gr. laga um félagsþjónustu sveitarfélaga segir að sveitarstjórnir eigi að stuðla að því að aldraðir geti búið við eðlilegt heimilislíf svo lengi sem verða má. Þá segir: „Jafnframt verði tryggð nauðsynleg stofnanaþjónusta þegar hennar er þörf.“

Skv. lögum um málefni aldraðra skipa sveitarstjórnir í þjónustuhóp aldraðra, sem gerir m.a. tillögur til sveitarstjórna um öldrunarþjónustu og metur vistunarþörf aldraðra.

Ábyrgð sveitarfélaga á að tryggja öldruðum stofnanaþjónustu þegar þeim brestur heilsa og þrek til sjálfstæðrar búsetu er því skýr. Þótt ríkið taki þátt í kostnaði við uppbyggingu öldrunarstofnana og greiðir stóran hluta af rekstrarkostnaði þeirra, er það á ábyrgð sveitarfélaga að meta þörf fyrir hjúkrunarrými. Þar liggja upplýsingar um þarfir íbúa fyrir samfélagslega þjónustu á hverjum tíma. Flest sveitarfélög landsins hafa gegnt þessari skyldu sinni með ágætum. Þegar í heildina er litið eru næg hjúkrunarrými hér á landi til að fullnægja þörf fyrir hjúkrunarrými fyrir aldraða. Þeim er hins vegar misdreift um landið. Skortur á hjúkrunarrýmum er fyrst og fremst á höfuðborgarsvæðinu, sérstaklega í Reykjavík.

Skv. lögum eiga sveitarfélög að leggja til 15% af byggingarkostnaði hjúkrunarheimila. Í stjórnartíð Sjálfstæðisflokksins í Reykjavík brugðust borgaryfirvöld við skorti á hjúkrunarrýmum m.a. með byggingu Droplaugarstaða með 65% kostnaðarhlutdeild á árinu 1981 og Seljahlíðar með 100% hlutdeild á árinu 1986. Ekkert slíkt framtak átti sér stað í tíð R-listans til að bregðast við sama vanda. Hins vegar liggja nú þegar fyrir áætlanir um byggingu 400 hjúkrunarrýma á næstu árum að mestu á höfuðborgarsvæðinu.

Það er því ljóst að R-listinn sofnaði á verðinum í þau 12 ár sem hann sat við stjórnvölinn í Reykjavík. Því finnst mér ótrúlega djarft leikið af Samfylkingunni að slá upp auglýsingu um að flokkurinn vildi byggja 400 ný hjúkrunarrými á næstu 1 1/2 ári, þegar meginhluti vandans er á ábyrgð þeirra sjálfra! Hverra er „vanrækslusyndin“? Ég spyr!

Höfundur er alþingismaður í Reykjavík.