Hörð gagnrýni Samtaka iðnaðarins á Seðlabankann

Samtök iðnaðarins gagnrýna bankastjórn Seðlabanka Íslands harðlega fyrir verulega vaxtahækkun í dag. Að mati Samtakanna er hækkunin misráðin. Ákvörðun bankans mun til skamms tíma stuðla að óraunhæfri styrkingu á gengi krónunnar.

Í tilkynningu frá Samtökum iðnaðarins segir m.a. að vaxtahækkunin eykur til lengri tíma litið hættu á snörpu gengisfalli með verðbólguskoti og kaupmáttarsamdrætti. Hækkunin ýtir undir flótta fyrirtækja frá háum vöxtum, sterku og óstöðugu gengi.

Vaxtahækkunin mun enn auka umsvif erlendra spákaupmanna sem hafa fært mikið fé inn í hagkerfið, þó ekki til að fjárfesta í íslenskum atvinnurekstri heldur til að hirða auðfengin vaxtamun. Þeir geta horfið án fyrirvara.

Verðbólga mælist nú 4,5% en án fasteignaverðs er hún aðeins 1,3%. Seðlabankinn tekur fasteignaverð með inn í verðbólgumarkmiðið og hækkar vexti þrátt fyrir þá staðreynd að verð á vörum og þjónustu er lítið sem ekkert að hækka.

Stýrivextir Seðlabankans hafa hvorki teljandi áhrif á langtímavexti íbúðalána né á verðþróun fasteigna frekar en heimsmarkaðsverð olíu og hveitis. Þannig berst Seðlabankinn við fasteignaverðbólgu með bitlausu vopni. Raunar hefur hækkun stýrivaxta þau áhrif til skamms tíma að auka einkaneyslu, þvert á markmið bankans, enda gjaldeyrir á útsölu.