Stjórnarsamstarf er ekki til framdráttar Framsóknarflokki

Þó að ég geti tekið undir þá skoðun að stjórnarsamstarf Framsóknarflokks og Sjálfstæðisflokks hafi lengst af blessast bærilega, er ekki þar með sagt að það sé á vetur setjandi eins og nú er komið kjósendafylgi Framsóknarflokksins. Þvert á móti. Endurnýjun samstarfsins er Framsóknarflokknum ekki til framdráttar. Slík endurnýjun er aðeins greiði við Sjálfstæðisflokkinn.

Kjósendur sendu forustumönnum Framsóknarflokksins ótvíræð skilaboð um að nóg væri komið af setu þeirra í núverandi ríkisstjórn. Raunar felst það einnig í þessum skilaboðum (sbr. úrslitin í Reykjavík) að flokknum sé ekki sætt í neinni ríkisstjórn á nýbyrjuðu kjörtímabili. Þótt vitaskuld snúist stjórnmál um völd og valdastóla, er einber valdapólitík ekki til fyrirmyndar.

Forusta Framsóknarflokksins á aðeins um eitt að velja: Að styrkja grundvöll og innviði flokksins, leita uppi hina týndu sauði þess markhóps, sem hingað til hefur verið stoð flokksins í bæ og byggð en er nú tvístraður.

Framsóknarmenn og aðrir ættu að minnast þess að Framsóknarflokkurinn átti góðu gengi að fagna í Reykjavík þar til allra síðustu ár. Eitthvað hefur farið úrskeiðis.

Höfundur er fyrrverandi menntamálaráðherra.