Exista með góðan hagnað

Exista skilaði góðum hagnaði á fyrstu níu mánuðum ársins, eða 870 milljónum evra, jafngildi 76 milljarða króna. Hagnaður á þriðja ársfjórðungi var 7,4 milljónir evra eða 646 milljónir króna en miklar sveiflur voru á fjármálamörkuðum á tímabilinu.

Þetta er talsvert yfir væntingum greiningardeilda viðskiptabankanna en meðalspá þeirra hljóðaði upp á 120 milljóna evra tap á þriðja ársfjórðungi.

Eignir félagsins hafa aukist um 93% frá áramótum og voru 8,5 milljarðar evra eða 746 milljarðar króna í lok september og nam eigið fé 2,7 milljörðum evra eða 237 milljörðum króna sem er aukning um 43% frá áramótum.

Arðsemi eigin fjár fyrstu níu mánuði ársins nam 45,9% á ársgrundvelli. „Afkoma Exista fyrstu níu mánuði ársins var góð og nam hagnaður á tímabilinu 870 milljónum evra eða sem svarar 75 milljörðum króna," segir Lýður Guðmundsson, stjórnarformaður Exista.

„Þriðji ársfjórðungur markaðist að nokkru af þungu árferði á fjármálamörkuðum. Þó var afkoma félagsins jákvæð í fjórðungnum, þrátt fyrir umtalsverðar lækkanir á mörkuðum víða um heim. Það endurspeglar sífellt fjölbreyttari tekjustoðir félagsins."