Bakkavör Group kaupir breskan hráefnisframleiðanda

Bakkavör Group hefur keypt breska matvælafyrirtækið Welcome Food Ingredients Ltd. Fyrirtækið framleiðir bragðefni og sósur til matvælaframleiðslu. Kaupin voru fjármögnuð úr sjóðum félagsins en kaupverðið er trúnaðarmál.

Í tilkynningu frá Bakkavör segir að Welcome Food Ingredients hafi verið stofnað árið 1994 og sérhæfi sig í notkun ferskra og þurrkaðra hráefna við framleiðslu bragðefna og blandna á borð við sósur, deig og þykkni fyrir matvælaiðnaðinn. Fyrirtækið sé staðsett í Nottinghamshire í Bretlandi og starfsmenn þess 115 talsins.

Ágúst Guðmundsson, forstjóri Bakkavarar, telur að kaupin á fyrirtækinu komi til með að styrkja stöðu Bakkavör Group í Bretlandi.