Brú fjárfestir í útgerðarfyrirtæki

Brú II Venture Capital Fund hefur fjárfest fyrir sjö milljónir bandaríkjadala eða sem nemur 449 milljónum króna í sprotafyrirtækinu FS-10 ehf. sem er útgerðarfyrirtæki með höfuðstöðvar í Reykjavík. FS-10 var stofnað í þeim tilgangi að nýta íslenska sérfræðiþekkingu við útgerð stórra fiskiskipa á hafinu undan Máritaníu en stofnendur fyrirtækisins hafa víðtæka reynslu af sjávarútvegi.

Brú er eini aðilinn sem fjárfest hefur í FS-10 en þetta var fyrsta hlutafjárútboð fyrirtækisins. Þetta er jafnframt fyrsta fjárfesting Brúar á sviði sjávarútvegs. Sigurður I. Björnsson og Herdís Fjeldsted önnuðust samninga vegna fjárfestingarinnar fyrir hönd Brúar. Framkvæmdastjóri FS-10 ehf. er Sigurbjörn Svavarsson.