Viðskipti innlent

Björgólfsfeðgar og Þorsteinn með milljón á mánuði

Gamli Samson-hópurinn stýrir fjórum stjórnum félaga í Kauphöllinni
Gamli Samson-hópurinn stýrir fjórum stjórnum félaga í Kauphöllinni

Björgólfur Guðmundsson, Björgólfur Thor Björgólfsson og Þorsteinn M. Jónsson eru launahæstu stjórnarformenn félaga í Kauphöllinni. Þeir þiggja allir rúma milljón á mánuði fyrir stjórnarformennsku í félögum sínum. Sá sem þiggur lægst laun er Gunnar Felixson hjá Vinnslustöðinni en hann fær tæpar 100 þúsund krónur fyrir sitt starf.

Það er greinilegt á þessu að bankarnir borga stjórnarformönnum sínum best. Björgólfur Guðmundsson er formaður bankaráðs Landbankans, Björgólfur Thor er stjórnarformaður Straums-Burðaráss og Þorsteinn M. Jónsson stýrir stjórn Glitnis. Sigurður Einarsson er stjórnarformaður Kaupþings og fær 800 þúsund krónur á mánuði fyrir það. Hann er hins vegar starfandi stjórnarformaður og eru laun hans örlítið hærri en það þegar allt er tekið saman.

Í gær var samþykkt á aðalfundi Alfesca að hækka laun stjórnarmanna félagsins. Sú hækkun þýðir að Ólafur Ólafsson, stærsti hluthafinn og stjórnarformaður, er með 10,5 milljónir í árslaun eða 875 þúsund krónur á mánuði.

Þrír einstaklingar, Jón Ásgeir Jóhannesson, Lýður Guðmundsson og Magnús Þorsteinsson, gegna stjórnarformennsku í tveimur félögum. Jón Ásgeir ræður ríkjum hjá 365, sem á meðal annars Vísi, og FL Group. Lýður er stjórnarformaður Bakkavarar Group og Exista og Magnús er stjórnarformaður hjá Icelandic Group og HF Eimskipafélagi Íslands.

Björgólfur Thor Björgólfsson þiggur 1,050 milljón á mánuði fyrir stjórnarformennsku í Straumi-Burðarás.
Árni Oddur Þórðarson er stjórnarformaður Marel og fær 525 þúsund krónur á mánuði.
Benedikt Jóhannesson er stjórnarformaður Nýherja og fær rétt rúmar 200 þúsund krónur á mánuði fyrir vikið.
Björgólfur Guðmundsson ber hinn virðulega titil formaður bankaráðs Landsbankans og þiggur 1,050 milljón á mánuði í laun fyrir það.
Bogi Pálsson er stjórnarformaður Flögu Group og fær 100 þúsund krónur á manuði fyrir að sinna því starfi.
Gunnar Felixson, fyrrverandi forstjóri TM, er stjórnarformaður Vinnslustöðvarinnar og fær 92 þúsund krónur á mánuði.
Gunnlaugur Sigmundsson hefur nýtekið við stjórnarformennsku í Icelandair Group og fær 400 þúsund krónur á mánuði.
Gunnlaugur Sævar Gunnlaugsson er enn sem komið er stjórnarformaður TM og fær 400 þúsund krónur á mánuði.
Jón Ásgeir Jóhannesson gegnir stjórnarformennsku í tveimur félögum. Hann fær 200 þúsund krónur á mánuði hjá 365 og 700 þúsund krónur hjá FL Group.
Lýður Guðmundsson er stjórnarformaður Bakkavarar Group og fær 271 þúsund krónur á mánuði fyrir það. Hann er einnig starfandi stjórnarformaður Exista þar sem hann fær 550 þúsund krónur á mánuði.
Magnús Þorsteinsson ræður ríkjum á tveimur stöðum. Hann er stjórnarformaður Eimskips þar sem hann fær 650 þúsund krónur á mánuði og hjá Icelandic Group þar sem hann fær 200 þúsund krónur um hver mánaðarmót.
Ólafur Ólafsson fær um 10,5 milljónir í laun á ári fyrir að vera stjórnarformaður Alfesca.
Sigurður Einarsson er starfandi stjórnarformaður Kaupþings og þiggur 800 þúsund krónur á mánuði fyrir það.
Þorsteinn M. Jónsson er launahæsti stjórnarformaðurinn ásamt Björgólfsfeðgum. Hann fær 1,050 milljón á mánuði fyrir að stýra stjórn Glitnis.
Þorsteinn Vilhelmsson er stjórnarformaður Atorku Group og fær 500 þúsund krónur á mánuði fyrir það.
Þórdís Sigurðardóttir er konan í karlaveldinu. Hún er stjórnarformaður Teymis og þiggur 200 þúsund á krónur á mánuði fyrir það.


Mest lesið


Fleiri fréttir

Sjá meira


×

Mest lesið