FL Group á nú 83,7% í TM

FL Group hf. hefur náð samningum við Glitni banka hf., Hnotskurn ehf. og Samherja hf. um kaup á öllum hlutum þeirra í Tryggingamiðstöðinni hf. (TM) en um er að ræða 46,2% eignarhlut. Seljendur fá í sinn hlut 973.673.140 hluti í FL Group á genginu 24,3. FL Group átti fyrir kaupin 37,6% hlutafjár í TM og á því eftir kaupin 83,7%.

Kaupverð hlutanna er 47 kr. á hlut og samanlagt kaupverð því tæpir 24 milljarðar króna. Kaupin verða að fullu fjármögnuð með útgáfu nýs hlutafjár í FL Group hf.

Guðbjörg M. Matthíasdóttir, sem var stærsti hluthafi TM, og fleiri seldu bréf sín í félaginu til Glitnis fyrir hálfum mánuði á genginu 46,5 krónur á hlut. Glitnir sagði þá að hluturinn yrði ýmist seldur allur eða í hlutum til fjárfesta.

Kaupin nú eru háð samþykki hluthafafundar FL Group sem haldinn verður þriðjudaginn 25. september. Þar verður borin fram tillaga um hækkun hlutafjár félagsins vegna kaupanna. Viðskiptin eru ennfremur háð samþykki Fjármálaeftirlitsins. FL Group mun í kjölfarið gera öðrum hluthöfum í TM yfirtökutilboð og er gert ráð fyrir að TM verði afskráð af OMX Reykjavik.

Í frétt um málið segir m.a. að í kjölfar viðskiptanna eykst styrkur FL Group verulega og eigið fé fyrirtækisins mun aukast um tæpa 24 milljarða króna. Heildareignir FL Group námu við lok annars ársfjórðungs um 320 milljörðum króna og heildareignir TM á sama tíma voru rétt um 75 milljarðar króna. FL Group hefur því á þessu ári, líkt og undangengin ár, stækkað hratt og umsvif þess aukist að sama skapi. Heildareignir félagsins námu 263 milljörðum króna í upphafi ársins.

Stjórnendur FL Group telja að með þessum kaupum opnist tækifæri fyrir félagið á nýju sviði og að möguleikar félagsins til áframhaldandi vaxtar á fjármálamarkaði aukist. Kaup FL Group á TM er fyrsta skref félagsins inn á tryggingamarkaðinn en fyrir hefur það beint sjónum sínum mjög að bankageiranum og er stærsti hluthafinn í Glitni banka ásamt því að eiga umtalsverðan hlut í þýska bankanum Commerzbank.